Yèr nou la anparl bann plan lo parti la fé pou dévlop La Rényon. Zordi mi vé oir avèk zot dë poin néna dann program nout parti é pou moin sé bann poin inportani : inn sé la sékirité alimantèr, l’ot sé l’otonomi énèrzétik : sa dë projé nout parti la mète o poin dopi lontan é kan la gingné, la komans fé l’aplikasyon.

Donk promyé poin sé la sékirité alimantèr.
In pé i di sa sé in n’afèr La Rényon la pa bézoin pars késtyonn manzé li pé gingn ashté sa avèk d’ot péi : lo blé sé avèk La frans épi l’érop. Dori avèk tout péi demoun i plant de ri. La vyann i trouv isi épi déor an mèm tan. Frui avèk légime nénai isi an kantité épi déor si i gingn sa. Sékirité alimantèr ? Sanm pou moin sa i vé pa dir lo péi i produi tout sak i fo pou lo moun manzé mé li produi lo pli prinsipal. Sékirité alimantèr ? Sa i vé dir galman in léshanj gagnan-gagnan rant nout péi é lé zot sak lé pa tro loinn nou. Dann mon idé, é an suivan lidé mon parti, la sékirité alimantèr si ni konpran sa konm moin la mark an-o la ni pé an avoir sa isi shé nou.
Par koman ? Pars néna asé la bone tèr an frish shé nou - néna kant mèm sète mil éktar la bone tèr an frish isi ! é sa la pa in pti pé la tèr – ésa lé bon pou asur nout sékirité alimantèr é mèm si i fo donn kou d’min nout bann voizin si siklone i ravaz z’ot bitasyon. Si ni vé : viveman la sékirité alimantèr an solidarité avèk bann péi loséan indien nout lantouraj.

Dé romark kant mèm :
Inn i fo pa ni kont dsi baton tonton pou travèrs la rivyèr é fransh vérité ni doi pa alé mète anou dann in nouvo dépandans par raport lé zot. In pé i di : « Lèss Madégaskar va nouri anou pars laba néna térin, laba i pé fèr tout é ni pé pèye avèk nout larzan. ». Moin pèrsonèl mi trouv sa la pa réalis ditou. Mi pans konm moin la marlk an-ola lé bon, é bien bon pou nou épi pou lé zot, mé la dépandans la pa in bon n’afèr ditou. Nou néna léspèryans la dépandans kolonyal épi néokolonyal é i fo pa ni obliy bann léson listoir la déza donn anou.
Dézyèm romark Antansyon si in moun i di amoin i fo dévast karo kann pou asur lo manzé, moin mi di non : la pa bézoin dévast nout kann pou sa. An in tèrkalèr i plant pa légime, i plant pa séréal, i plant pa zépis ? Dann bann zardin d’vil i plant pa lo frui avèk légime, i élèv pa bann ti zanimo ? L’agro forèstéri, i fo pa zété non pli pars ou i pé an avoir la foré épi produi lo frui, légime séréal é tout sak i s’ansui-salé buien vré sa ! Alor, avèk bann téknik konmsa ni gingn agrandi bonpé nout léspas agrikol é sa lé bon pou nou . Alon pa non pli obliy bann téknik konmla pèrmakultur épi lo lakouaponi, alon pa obliy lo plantasyon avèk lo strees s idrik san lo anplis ké a natir i done anou. Alor, la dékirité alimantèr, in rèv ? Non, in réalité pou trapé.