Si ni panss noute parti néna lé bone zidé k’i fo. Si ni panss noute pèp Rényoné néna lintélizanss pou konprand kossa lé bon pou nou é kossa lé pa bon. Si ni panss bande zidé just i fé pézapé zot shomin dann lopinyon rényonèz é ké na poin d’rézon ké li kontinyé pa son progrèssion. Si pou demoune sèryé, nou lé ankor loin pou trape nout vré dévlopman mé na poin d’rézon pou k’ni trape pa.

Alor mézami lé tan nou rokomanss noute marsh an avan.

Si ni panss, issi La Rényon néna bonpé voiyan dann rouj é si ni antrevoi pou kossa é koman i fo pou mète azot o vèr. Si kan ni rogarde lo monde otour d’nou é ni konstate k’in pé partou bande solission ni rode i égzist, é la pa bézoin alé dékrosh la lune pou trouv la solission pou noute problème. Si ni konsidère issi la Rényon néna dé zom é néna dé fame an kapassité pou fé avanss noute péi é mète ali anlèr.

Alor, mézami lé tan ni rokomanss noute marsh an avan.

Si nou néna an orèr dé shoze ki égziss issi La Rényon é dopi tro lontan. Si nou néna la mizèr an orère, é ni souète torde son kolé. Si nou néna an orèr l’inégalité rante sak lé rish épi sak lé pov. Si ni aksèpt pa k’i kontinyé trète anou konm demoune mineur, é si ni kroi nou lé bon pou trape noute majorité issi é koméla. Si nou néna an orèr lo mank solidarité dann la sossyété rényonèz, lo mank l’égalité, é lo manke fratèrnité.

Alor, mézami, lé l’èr pou nou rokomanss noute marsh an avan, si ni panss dopi kéktan, ni pyétine in pé an plass..

Shomin Granboi sa lé long, pti pa, pti pa, n’arivé !

Justin