D’apré sak mi antan, nana in zos dann la késtionn l’èd pou pèy bann biyé lavion. Na déza in bon koup de tan, la rézion, lo dan l’apré grinsé pou sa : i dépans, i dépans, i dépans mé i dépans larzan la poin akoz l’Éta la pa tro préssé pèy son dète... Sa la pa in nouvoté pou nou ! Désèrtène foi, l’Éta lé konm sa, gran prométèr-ti donèr.
Soman, pou bate tanbour, sa zot lé for ! I apèl sa son kominikasion. Toute kalité batèr d’tanbour i fé zot solo : préfé-li, minis-li, prézidan-li. Apré, i amors la pomp larzan : zot i oi bien, i fé sak la di ? Épi, toudinkou, silans radio. Zorèy koshon dann marmite poi ! Lans aou, rolans aou, kri sokour, arkri sokour. Zorèy miète !

Alors Mésyé lo préfé, kossa i fé so koméraz biyé l’avion ? La pa bézoin trap out diksionèr ziridik pou shante anou zistoir lo dotasion, lo sibvansion. Korona, korolys, la pintir, sharzèr d’lo, tousala ni koné. I fé lontan i boush nout zié konm sa.
Di anou in sinp zafèr ! Larzan nana, larzan napoin ? Alors, dann out koin d’zorèy, m’a di aou in patoi ou va tir parti, moin lé sir !... Patoi-la i di konmsa : « La rob titine lé kourt, koup par an o, alonz an ba ».

Justin