Mésyé, médam, la sosyété mi pans zot i koné kozman-la. An touléka zot i koné d’ot konm :amar lo kèr ,amar in moun o pyé d’li( obliz al maryé),moun-la lé amaré sa donk li lé ansorsélé .

Mi arète la, pars néna in bonpé léksprésyon avèk lo vèrb amaré.La plipar d’tan sé inn késtyonn sor, in késtyonn mové sor. Mé si ni arparl nout promyé kozman :amar la boush kabri sé port la movèz shans, mète in sor pou anpèsh in moun ète lib, épi résponsab, ète mèt dé li mèm.Mé afèr i parl kabri ?Kabri i port la shyass sa ?

Mi pans pa mé zot i koné isi La Rényon néna demoun in pé tout nasyon épi néna dé défandi-interdi si zot i vé- dsi la késtyonn manzé : in pé i manz pa koshon, in pé i manj pa bèf, désèrtin i manz pa kabri ,zot la mèm pèr d’ète malad si zot i marsh dsi la taye kabri.D’apré sak mi koné sa sé plito bann rényoné i sort Madégascar i koné so défandi-la.Final de kont kosa so bann z’interdi-la i vo, kosa zot i vo pa, moin pèrsonèlman an tan k’yab mi koné pa tro, mé tout fason mi réspèk la kroiyans lo moun.

Alé ! Mi kite azot rofléshi dsi kozman-la é ni artrouv pli d’van.
Sipétadyé !