Mésyé, Médam, La sosyété, koz èk moin sé koz èk in kouyon-mé sé opyé d’lo mir k’i oi lo mason. Zot i koné isi La Rényon bonpé d’moun i pans lé posib aport la movèz shans lo mond arienk par la parol, sansa par lo sor. Sé konmsa k’in zour, mi ansouvien d’sa, konm si lété yèr, in moun zalou la zète in sor dsi in jenn madam té i vé pa sort avèk li. Poitan kik lété mon dyé ségnèr ? Zis in marmaye lékol amouré konm in shien pou inn po d’patate é k’i pansé fé sa vi avèk sak pou li lété l’élu dann son kèr. Donk li la parti oir in sorsyèz épi li la di : mi vé fiy-la lé amoin, sansa èl i tonm an sand dovan moin toutsuit-la. Fransh vérité, lo fiy la pa tonm an sand, é èl la kontinyé son parkour avèk in garson solon èl lété plézab pou vréman. Alé ! Mi kite azot rofléshi la dsi é bien kalkil in sor souvan dé foi sa i marsh pa. Ni rotrouv pli d’van. Sipétadyé !