Mézami lé pa touzour demoune lé bien déssidé anvèr ou. Lé pa touzour k’demoune i souète wi réissi dann oute lantropriz. I ariv mèm dé foi demoune i souète oute prozé i kapote.

Amar lo kèr avèk in moune sé souète ali in movèz shanss. Sé porte ali malèr sé zète ali in mové sor tèl fasson li réissi pa dan la vi. Lé vré la pa touzour k’in mové lintanssion i réaliz dan la vi. Défoi sé lo kontrèr k’i spass.

Mézami, mi koné pa si zot i kroi lo sor sansa si zot i kroi pa. In pé rantre nou i kroi lo sor, néna d’ote i kroi arienk la rézon sak i fé ké zot lé for, sak i fé ké lo mové sor i fé dsi zot konm lo dsi fèye sonz.
Alé ! Mi kite azot rofléshir la dsi é ni retrouv pli d’van, sipétadyé.

Justin