Mi souvien néna in bon pé d’tan sak ni apèl koméla « in fime » bann zansien téi apèl sa in « pyès ». Souvan dé foi ou té i antann : « Garson i amène la pyès ». Té i antann galman : « té in gayar pyès mé domaz Garson i mor dsi la fin. ». Garson lété « Kid Carson » dann komansman, apré shak foi l’avé in védète sansa in éro téi kriy sa « Garson ». Sirtou dann poulayé demoun té for pou sa. Aprésa, sanm pou moin, kozman-la la pass dann la vi normal, donk la sort dann la vi artifisyèl ou i trouv dann sinéma. Ou amène la pyès kan ou sé lo shèf kisoi dann travaye, kisoi dann bitasyon, kisoi dann in prozé, in biro sansa d’ot afèr ankor. Malorèzman koméla plizanplis sé bann moun i sort déor i amène la pyès ! Kansa bann rényoné sar in pé lo shèf ? Kansa zot v’amène la pyès ? Lé pliské tan ! zot i pans pa ? Alé ! mi lèss azot rofléshi la dsi é ni artrouv pli d’van sipétadyé.