Amène sa an zardin ékolozik.

Zardin ouvriyé.
La-ba dan La France, dan l’antouraz bann vil, nana zardin ouvriyé. Zénérasyon, apré zénérasyon bann moun i okip dé sa vèy pa koman, i donn sa lo soin k’i fo, i donn sa l’amour. La tèr, d’apré sak mi antan dir, nana la rokonésans. Èl i donn banna lo frui épi légime zot la bézoin pou joinn lé dé boute par l’milyé.
Bou di konte, in pé partou nana sa, pou pa abandone la tèr bann zansète épi pou gingn in pti zafèr pou konplète in pé in salèr lé pa sifizan, pou gingn in moné, donkalor pou gonf in pé lo pla. Moin la tandi di sa pou lil Maurice, pou bannzil Komor, anfin pou d’ote péi ankor.

Zardin sosyal la Sidr.
La Sidr la déside fé sa ossi La Rényon. La komans par Bèlpyèr, é i parétré va fé sa in pé partou ousa va gingné. Lé byin, pars kréol i ème la tèr, sa lé sir ! In bonpé i sorte la kanpagn épi fransh vérité... la-mèm zot nonbri lé antéré. Dann déssèrtin péi, i di la tèr sé nout momon, é pou in bonpé sa lé vré. Pou d’ote sé la mèr, sansa in flèv, ou byin in foré.
Anfin tanmyé, la Sidr la déside fé sa issi. Bann lokatèr va gingn in karé la tèr pou kiltivé. Mi éspèr zot va byin okip dé sa avèk l’amour ké ni doi an avoir pou la tèr, san gaspiyé, san détrui avèk in takon produi shimik. Si plé t’a Dyé, amène sa byin konm k’i fo, an zardin ékolozik.

Justin