Mézami, mi rapèl in momon sak téi di par raporte son garsson. El téi di : « Mi rokoné pi mon garsson, son fame i amenn ali par son boute né. ». Romarke in n’ote noré pi di lo mèm zafèr par raporte son fiy… Antouléka, d’apré sak mi konpran, lo né lé si tèlman sansibe ké si i amenn aou par-li, lé bien difissil rézisté.

In zour mi souvien-pars dann tan-la mwin l’avé déza trape mon konéssans – noute bèf in nomé Roujé-amwins ké sé La fleur la pèze mon papa konte in pyé d’boi é li t’apré pèrde la réspirassion. Inpossib ropouss lo bèf. Sé la k’in bone idé la vni dann son tète : li la bour son min, mèm son poing – dann nazo lo bèf épi la apiye an tournan. Baba ! i diré lo bèf la tonb fèb é li la larg mon papa épi li la baré. Demoune té la, la kol ali avèk son korde… Konm de koi, la viktoire lé pa toussèl, an kontrère d’la défète.

Alé ! Mi kite azot rofléshi la dsi é ni artrouv pli d’van. Sipétadyé.