Mézami la pa bézoin tro diskite dsi lo sans kozman-la é sanb pou mwin, zot la fine konprande sé in moune k’i amenn pa la vi konm k’i fo kissoi par son moralité k’lé pa bon, kissoi par lo moune li frékante — frékante lo shien é ou va gingn lo puss.

I di ossi tazantan « amenn la vi an dégréné » osinonsa « amenn la vi an baton d’shèz » épi d’ote kozman ankor pars sé dir azot kan kréol i vé difize in moune, li mank pa limazinassion, li mank pa vokabilèr non pli.

Mé d’apré mon romark pèrsonèl, toussa i shanj si la pèrsone i gingn flaté, kissoi par in sourir épi pa in bon mo, akonpagné avèk in pti kado. La vi lé konm li lé, é lo moune konm ni koné.
Mi domande azot bien rofléshi la dsu é ni artrouv pli d’van. Sipétadyé.

Justin