Mi pans sa in kozman bann z’ansien i koné bien. Moin pèrsonèl, moin la fine antann ali dé foi é dé foi. Mi pé mèm dir, moin osi moin la di sa mé dousman-dousman pars mi yèm pa véksé. Zot i koné la pa difisil rann aou kont kan dë pèrson e i yèm pou vréman : i diré dsi inn néna in pol plis é dsi l’ot néna in pol moins é zot i koné lo plis avèk lo poins sa i atir inn a l’ot..I pé di ankor, lé konm shoushoute avèk la mori pars zot i koné sa i akord bien sa inn avèk l’ot. Astèr pou kosa i di amouré konm in shien pou in po d’patate ? Mi pans néna poin granshoz pou émé dann in po d’patate sof pou in shien si sé li la trap lopo d’patate an promyé. Sa lé a li é la poin pèrsone pou dérout ali san bataye. Sansa, antansyo in kou d’dan lé vite arivé. Alé ! Mi kite azot rofléshi la dsi é ni artrouv pli d’van. Sipétadyé !