A ! Biensi in pé rante nou l’avé konm éro bande kamarade la amènn la lite dann parti kominis. Mi sava pa dir azot lo nom, mé noute toute i koné lo bande nom. Sak la amenn la lite dann tan larépréssyon, lo tan la frode éléktoral, lo matrakaze bande kass an fèr, épi la répréssyon sossyal, é lo tan bande konkète kissoi politik, kissoi sossyal, kissoi kiltirèl. Lé sir sak la milite dann tan-la zot té in pé pliss andirssi ké sak la konète souvan défoi la fassilité.

Pou mon par, mwin néna in éro é éro-la sé lo parti kominiss li même. Vyé jé ? Pa tèlman mé lo sanss noute listoir. Lo zour demoune va ékri listoir noute parti, lo léktèr va di an li même lé pa possib k’in parti – in sinpe parti – la fé sak li la fé pou noute péi.

Lé in pé tar pou fé noute listoir, mé konm i di, même si lé bien tar, lé zamé tro tar… d’apré mwin.

An atandan mi panss i fo ni kontinyé fé avanss listoir noute parti épi fé avanss ossi listoir noute péi pars sa sé lo dévoir bande militan lo parti, bande zélu galman, épi toute sak néna noute parti an sinpati, épi sak i partaze noute bande zidé… toute sak konm mwin i panss noute parti sé nouté éro.

In fasson bien sinpe :

Noute toute i koné noute parti néna in kantité lidé, é li la fé in kantité propozission. Alor, si nou lé fidèl nou néna kékshoze pou fère. Ni pouré shoizi dann programme noute parti inn sansa dé ou bien troi propozission noute parti é fé avanss sa, toussèl sansa groupé épi tazantan fé in kou lo bilan pou oir si nou la gingn fé avanss lobzèktif nou la shoizi.

Pars nou lé sir an fézan sa ni fé avanss noute parti mé galman noute péi. In bon projé dan la vi. Zot i panss pa ?

Justin