Program Parti kominis i rokomand fé dé gran sèrvis : inn pou bann travay dan la proksimité, inn dann l’anvironeman. Dann l’anvironeman, i prévoi fé bann z’anploi vèr. Pou kossa ? Dabor inn pars shomaj i fé tro déga an parmi nout bann konpatriot é lé myé demoun i gingn zot vi avèk zot kouraj ké kondane azot domann siouplé toultan. Dézyèm z’afèr, pars dann sèrvis-la lé possib donn in bon pé kréol travay.
Biensir, dann program-la, lé prévi fé formasyon pou nout bann konpatriyot pars i fo zot i aprann bien zot métyé. Arzoute èk sa in bon l’ankadroman, é pi in bann shantyé vréman itil pou lo péi épi pou l’moun. Boudikont, in vré travay, pou rodone demoun zot fyèrté pou rouvèr zot droi la Sékirité sosyal, l’asirans maladi épi la rotrète. In travay pou arpran favèr, pou arpran konfyans.
Ala sak la parti i vé, mé méssyé Didier avèk son bann konséyé i oi pa lé shoz konmsa. Zot i oi in sort ti-travay pou ashté la voi bann zéléktèr kan zéléksion i ariv. La prèv ? La Réjyon i donn larzan in bann sosyété la mèm poin shantyé pou antroprann. Alor, i mète lo moun an konzé avan k’zot la fine komans travay é sa dann bann kanton nana zéléksion. Dann kanton la poin zéléksion deboute-guète, atann kan nora.

Justin