Gouvèrnman i di li vé fé zékonomi. Li la donn bann minis z’ot fèy dé rout. In bon kréol i pé rézime sa konmsa : raz la pinte tanpir-k’i pé. Alor, banna la mète an marsh z’ot mashine pou razé. Konkour la fine komansé, sétaki i sar trouv lo méyèr plan.

Dopi issi, mi antann azot apré di : « I sa fé pèy bann rish ! I sa fé pèy bann nana lo pourkoi ! ». Oté ! Zot i rèv san dormi don ? Zot la pankor konprann kissa k’i diriz anou ? Zot i oi pa dovan z’ot zié, bann gouvèrnman la fine shoizi z’ot frékatasion : frékante pa lo shien, va gingn lo pis ! Bin, lo pis-la, sé bann ti-kolon ? Sé lo pèp ? Inn foi li la fine vote pou banna an mazorité, i anvoy ali fèr fout ?

Alor i di, va konomiz tann million l’éro déssi la santé dmoun, tann million déssi bann famiy, ranplas pa la moitié bann fonktionèr i sava la rotrète - konm sa va fé zékonomi... fé travay bann moun pandan karant-é-in n’an, konmsa va fé zékonomi dann tan la Sin Glin-Glin étsétéra, étsétéra, la ké lo ra...

Mé sa i kont par million solman sa ! Bin lo bann miliar i kado bann rish- la ? Sète-la i toush pa. An atandan, kabri i manz salad !

Justin