La mor, konm ni koné sé in n’afèr i ariv o bout la vi : ni vé, ni vé pa, mé lé konmsa. Kréol i di : la mor sa i doi. Moin lé dakor ! Solman konm moin zot i romark néna d’moun i rode ali kan zot i fé sak zot i fé : néna i boir la rak, i boukane sigarète, néna i manj manzé graé, néna i risk zot vi kan zot i fé bann trik danzérab. Donk alon dir dann désèrtin ka sé nou k’i gingn la mor é par nout résponsabilité ni abrèj nout vi.

Tousa lé vré, mé mèm kan ni fé pa tout sort shoz la médsine i konsèye pa, i ariv in moman ni mor. Mé alon pa obliye ni viv an sosyété, dann in péi, péi-la néna in gouvèrnman é gouvèrnman-la i amenn in politik santé kisoi pou nou viv an bone santé, kisoi pou ékonomiz larzan dsi la santé, kisoi ankor pars nout l’èr, nout manzé, nout lo la pa sak i fo pou fé fini nout vi normalman. Arzout ankor tazantan néna in bann gouvèrnman i tap azot dsi la guèl é forséaman sa i rakoursi nout vi. Pandann tan-la bann kapitalis i grosi zot pla é rondi zot kont bankèr é sa lé pa fé pou fé rèss anou pou lo grin.

Koméraz corona virus, sa va fini i tard pa : in pé i done ali troi moi, in pé i done ali sis moi, in pé i di antansyon apré in kou d’aré li va arvni l’ané proshène mé pou shak zour i sifi son traka… donk kan sar fini tout so tablatir-la, in pé i di i fo rod bann résponsab.I di toultan sa, mé i sava pa shèrch lo konpa nsasyon dan la posh bann plinn sou. Mi pans pa i sava kondane bann gran politik pou sa, mèm ké dé foi mi pans i fodré. Mé rant sak mi pans é sak v’arivé, i fé dé bien antandi.
Mi sava pa diskite a pèrt de vu dsi kisa la fé koué, sansa kisa la pa fé sak i falé fé. Dabor pars sak mi pé di i anpèsh ar pa la tèr tourn dési èl mèm. Mèm i anpèsh arpa èl gingn l’éshofman é ankor la néna lo résponsab. Mé néna in n’afèr mi yèmré, in bsinp zafèr, la viktoir in pti kashé i kout pa sink fran sis sou. Koman i apèl kashé-la, Moin mi apèlré ali nivakine, sansa mèm kinakrine.

Pou kosa kinakrine ? Pars kan moin lété dann ti lékol lo sèrvis la santé té i konbate la fyèv palidéène-i di osi la fyèv rémitant - avèk i pti kashé jone téi done bann marmaye in foi par somenn pou soign bann mové fyèv. Oté ! Sa té amèr, sa téi pène nout lang an jone,.konbien foi moin la modi atoué kinakrine ? Konbien foi moin la souète toué lé an mank ? Mé si zordi, toué ki vo sink fran sis sou, toué té i pèrmète vide la kèss bann kapitak i souète arienk grosi zot pla a pi savoir koman. Zordi mi souète ton viktoir pti kashé jone é mi souète an mèm tan ti koul bann gran laboratoir kapitalis.
Alé ! Pti kashé jone, fors in pé, amont ton kapab é si l’avé moiyin koul in pé avèk ton torpiye miniskil bann gran bato-laboratoir kapitalis. Si sa i ariv, zordi ké moin néna in paké d’zané, mi promète aou domann pardon pou tousa zirman moin la done aou kan moin lété pti. An avan pti kashé jone ! Done ali pou la valèr !