Zot la gard la télé kan lavé bann zé z’olinpik ? Zot la parti gard-gard in pé déssi Internèt dan kèl éta l’Inde lé randi ? Tazantan, zot i sava oir in pé kossa nana dann l’Afrique du Sud, dann l’Australie ? Non ! I intérès pa zot sa ! Zot i pran pa l’èr avèk banna ! Zot lé pa la avèk sa !
Lé bien domaz ! Lé bien rogrétan !
Akoz si zot kiriozité l’avé amène azot agard in pé dann so bann landroi-la, zot noré konpri in bon bout nout lavnir l’apré zoué tèr-la. Talèr, la Chine lé riskab ète promié péi dan lo mond pou son lindistri, son komèrs, pétète ossi son nivo d’vi. L’Inde i dévlop baya ! in vitès, vèy pa ! L’Australie lé modèrn é pliské modèrn. L’Afrique du Sud, sé lo promié péi dann l’Afrique.
Donkalor, si sak mi di lé vré, épi lé vré vréman, ni pé domann anou pou kossa zordi in bann moun i pans zot lé intélizan, l’apré sote konm kabri déssi z’ot shèz, épi i kri : « L’Europe ! l’Europe ! L’Europe ! », konm na poin lontan zot téi kri : « La Frans ! La Frans ! La Frans ! », dann in kozé boush plin, épi ni dévir nout do avèk bann péi i fo ni travay ansanm. Ni tourn le do nout lavnir.
Lé vré, lané 1939, gouvèrnman la Frans té i kroi té sar fé la guèr konm dann tan katorz-dizuit. Sa mèm té vé dir an avoir in guèr d’rotar... zot i pans zordi nou lé ankor dann mèm ka ?

Justin