Kan moin té i frékant l’ékol primèr, mi souvien bien l’avé l’ékol sink zour plin dan la somèn. Si zot i domann amoin kansa l’ékol té pli fatigan, mi pé réponn azot té lo mèrkrédi apré-midi, é lo samdi apré-midi. Dann tan-la, l’avé l’ékol mèrkrodi, épi zédi té lo zour l’avé katéshis. Arzout èk sa, lo soir l’avé loson pou aprann é inn-dé z’égzèrsis pou fèr. Mi sava pa dir azot té lo méyèr anploi di tan posib, é mi sava pa dir azot moin té kontan tou lé zour alé l’ékol.

Aprésa la somèn l’ékol la shanjé. Zot i koné bien, shak foi na in nouvo minis l’édikasion nasional, i fo li fé in réform, kisoi dan l’ékol matèrnèl, kisoi dann l’ékol primèr, ki soi dann kolèj ou sinonsa dann lisé. Sa sé sak demoun i di, é lé vré, mé souvan défoi, na demoun la travay la dsi épi la trouv l’avé dé shoz pou shanjé, kisoi pou la santé bann marmay, kisoi pou lo nivo bann z’élèv... M’a dir azot, mi konpran bien pou kosa i vé réform l’ékol, pars zordi, d’apré l’OCDE, la Frans na poin lo méyèr l’ékol kisoi. An parmi bann péi rish, èl sré près lo dèrnié la ké, é kan ou lé konm sa, lé dir pou romont dann klasman.

Lo nouvo minis i vé fé romont la Frans dann klasman. Li v’ariv o bi ? Li ariv ar pa ? Mi koné pa, mé pou èt kritiké, li lé kritiké, é bann mèr i tonm dakor pou la somèn kat zour é d’mi, demoun i tonm dsi zot bos. In pé i di, zot la pa diskit asé, d’ot i di, kisa i sava okip bann z’anfan rant midi é dé z’èr moin l’kar. Kan i di sa, moin na konm l’inprésion in pé i pans bann jèn i sava fé l’animasion na poin lo nivo k’i fo. Mé in nivo, sa i trap avèk la formasion, é si i done pa zot l’okazion travay, zot sar zamé kapab.

In shans pou zot si i mèt azot o boulo, in méyèr shans ankor si zot i niabou trap in kalifikasion. Moin pèrsonèl, mi di pa banna i sava ranplas lo l’amontrèr, ni lo paran, mé zot na kant mèm in bon rol pou zoué dan la kominoté édikativ an bon l’antant lé z’inn avèk lé zot.

Justin