Oté, mi sa di in n’afèr, skiz amoin si i fé pa ri. Poitan, sa i rosanm in kassaz lé kui an règ ; gouvèrnman i kass dé sik déssi son tète ali mèm !
Kossa li di ? La Frans lé déssi zant, la kèss lé vid, bann salèr i goumant ar pa, va travay pli lontan, lo prézidan i sava vann son vakans bann miliardèr... étsétéra, étsétéra, la ké lo ra. Alors la, moin la kal dé parasétamol inn déyèr l’ot, plis in ronm désèl san dépass la doz -moin lavé poin tizane matrékèr. Moin la kalkilé, kalkilé, kalkilé aprésa moin la trouv in léksplikasion : ala li la.

Dabitid sé lopozision ki di zafèr konm sa. La mazorité i réponn : alé zoué kanète déyèr bazar, nou ni fé épi zot konm zot i fé pa arien, zot i kontant azot « raisone » konm tanbour. Solman, gard bien télé, zot va oir napoin l’opozision, alors lo prézidan la déside zoué lo dé rol an mèm tan, sète la mazorité épi sète lopozision.

Oui ! Mé solman, mon l’éksplikasion lapré fatig mon tété. Si sé sa réelman, kansa sé inn, kansa sé l’ot ? Kansa, konm di défin Molière, dann son piès « lo rapiang » kansa mètr Zak lé kizinié, kansa li amène karos ?
Toul fason, sirtou, li amène anou an bourik, dizon an sharète shaviré.

Justin