In kozman pou la route

« An dalonaz »

16 désanm 2023, sanm Justin

Médam méssyé la sossyété, koz èk mwin sé koz avèk in kouiyon mé sé o pyé d’lo mir k’i oi lo lo masson.

Mézami, zédi mwin lété dan Por é zour-la mwin la aprann bann kamarade laba la fé l’assossiasion pou fé avanss la solidarité. Banna la di amwin zot la done zot group lo nom « an dalonaz ».

Pou kossa lo groupe i apèl « an dalonaz »… sé pars Lulu toulmoune i koné laba téi di toultan lékspréssion « an dalonaz »

Mwin la parti rogarde dann dikssyonère kossa sa i vé dir é oila kossa diksyonèr Alain Armand la di amwin : in dalon sé in konpagnon, kissoi in konpagnon d’travaye, kissoi in konpagnon dann l’amityé. Défoi mèm sa i sava pli loin.

Astèr « an dalonaz » i vien d’lo mo dalon é sa i vé dir « an amitié ». Pou in l’asossiasion sé in bon nom pars la solidarité i zoué in gran rol ladan. Pars si ou lé pa solidèr, si na poin rante le bann moune in vré kouran l’amityé, na poin arien pou fèr.

Alé ! Mi kite azot rofléshi la dsi…an dalonaz é ni artrouv pli d’van, sipétadyé.

Justin

Padport

Signaler un contenu

Inn modékri, inn ti lavi, inn komantèr ?