Mardi nou la anparl ansanm lo problèm bann plantèr lantiye vi ké zot lé bien annuiyé avèk sak i ariv azot : zot plantassion lé ataké par toute kalité nuizanss é zot i koné pa koman zot va fèr pou ansorte azot. Yèr soir, malorozman, dann télé nou la vi in jenn plantèr apré pass débroussayèz dann son karo lantiye pars d’apré li 80% son prodikssion lé fouti é li pass débroussayèz pou li plante d’ote shoz pou o moinss gingn démaye ali par li mèm.

Li konte dsi son prop forss mé akoté d’li l’avé lo Prézidan la shanm lagrikiltir téi kriye a l’ède bann koléktivité pars sansa in kiltir « anblématik » lo sirk silaos lé riskab disparète é avèk sa lo moune lé okipé par kiltir-la. Ki néna rézon ? Pou mwin lé dé néna rézon pars lo plantèr li komanss par konte dsi li mèm é li prépar in nouvo rékolt in n’ote prodikssyon pou li gingn kékshoz kant mèm dann son karo la tèr. E lo Prézidan alor ? Li la pèr lo sirk i pèrde son bann prodiktèr lantiye é banna i abandone la kanpagn pou alé rode zot sosso an vil.

Mé sak mwin la di yèr, mi panss lé vré ossi,kan mi di i fo in bon lankadreman dann la prodikssyon. Mon papa souvan défoi téi di-éskiz pou léspréssion- lé tro tar pou sèr... Kan la fini fèr dann dra. Dizon lé préférab pran a tan in bon tizane la rouroute. Dann lo ka k’i okipe anou lé myé roganiz in lofiss k’i suiv lo bann plantassion épi pran lo bann mézir k’i fo avan k’lé tro tar, mi di pa, dan in ka konmsa, in bon lankadroman nora sifi mé pétète oui é sirtou in lankadroman par d’moune issi, formé an konsékanss.

Toute fasson bann plantèr i doi konte dsi zot prop forss : zot éspèryanss, zot savoir fèr, zot dévouman épi lé sir zot i doizète ankadré épi édé sirtou si nou lé dann in ka d’lintéré zénéral. Konte dsi sonprop fors ala in bon prinssip !

In prinssip k’i marsh bien avèk noute kozman kréol : « Konte pa dsi baton tonton pou travèrss la rivyèr ! »

A bon antandèr, salu !