Dopi dan la nuit, dopi minuit nou lé an léta d’irzans, épila lo préfé néna tout pouvwar pou diriz lo péi. Si li san in moun i pé èt danzéré pou la sékirité dot moun, li pé obliz lo moun rèt son kaz, sé pou mèt la sékirité partou é pou protèz a nou, li pé anvoy la polis la kaz domoun ninport kèl èr, la nuit lo zour, ninportkan san pran lord èk pérsonn, li pé anil tout maniféstasyon, tout rènyon piblik, boudikont, i di, li néna lo dovwar vèy si nout sékirité. Konm li san.

An mwin minm mi koné pa si mwin na mon mo pou di la d’si, mi trouv, mon lidé a mwin, kit a mèt lo péi an léta d’irzans odrémié mèt a nou an léta d’irzans sosyal, konm ni réklam dopi lontan. Na lontan ni di, argard in pé bann pov, na lontan ni di, anon okip a nou bann moun i nyabou pa lir, sak na pwin la kaz, ni domann donn 6 pour san an plis bann minima sosio, ni propoz kré nout dé gran servis, inn pou lanvironman, in pou vié moun.

L’irzans sosyal pou fé la guèr kont lo shomaz. Somanké, aforstan okip lo problinm l’irzans sosyal, na pi bozwin mèt lo pèi an léta dirzans, kisa i koné ? Ni pé pa di zordi k’sak i éspass déor, i argard pa nou ? I prétan minm néna i apérswa in danzé pou nou. Konm banna déor nou lé an léta d’irzans, mé konm nou lé pa konm banna déor odrémié mèt a nou an léta d’irzans sosyal !