Lo prokonsil amérikin la kit l’Irak an misouk é, plis’ an misouk ankor é dann la présipitasion, bann zamérikin la soidizan rofil lo pouvoir in gouvernman irakien a zot bote. In parodi la pa tronpe persone !
Sirtou kan ni voi lo promié zès se nouvo gouvernman. La sékirité ou sinonsa la rolans’ lékonomi la pa lèr dèt son priorité dann in péi déshiré tou lé zour par la violans, par in gèr i fini pi. Non, son priorité dé priorité sé ziz Sadam Hussein !!
Konmsi lavé poin arien d’pli irzan pou fé. In prosé instrui par in tribinal spésial irakien, mis an plas’ par bann zamérikin, é san okin garanti internasional. Bonzour la vanzans’ èk son spiral la violans’ !!