Kant ou lé malad-malad, kant ou gingn pi débrouye out kari par ou mèm, ou la fine trap in sèrtin laz, épi ou la poin lo pourkoi konm k’i fodré, ou pé gingn l’APA (Allocation de perte d’autonomie). Sa in nafèr i pé pèrmète aou an avoir in sékirité, épi in konfor d’vi, lo tan ou fé lo gran voiyaz.

Alon mazine in vié pèrsone, dizon in vié momon. Èl la bézoin so lalokasion, mé èl i vé pa anuir son zanfan. Zot i koné koman kréol i lé ? Si lo zanfan lé pa oblizé ranbours lo moné, son kèr sar klèr. Èl va viv in pé mié malgré lo traka la maladi. Si i fo bann zanfan i ranbours, zamé èl va domann so lalokasion. Bonpé bann vié moun va préfèr manz zot mizèr plito k’mète z’ot zanfan dann malizé.

Ala kossa in bann sénatèr i fé ? Zot i désid lo larzan vèrsé va artrap sa déssi léritaz lo vié moun si na plis 100.000 euros pou partaz rant bann zéritié, épi bann zanfan va gard dann in trou. Si na in vié pti kaz, va vann ali, épi gouvèrnman va ansèrv ali an promié.

Sa in mové kou kont bann moun na poin. Kansa i fé sa ? Koman i fé sa ? La nuit, an misoukant, an volèr - akoz la nuit, i prétan tout bann shat lé gri.

Justin