Zot i koné promyé foi mwin la antande parl an piblik Lo Père lafosse lé pa si tèlman loin k’sa. Mi ansouvien mwin la lir dann Témoignages chrétien La Rényon déssèrtin zartik téi anparl de sa épi sirtou mi rapèl plizyèr diskour Paul Vergès an omaz bane rényoné mor san sépulture... Momandoné la komanss rande omaz bande mor san sépultur an mèm tan k’téi rande omaz bande mor ordinèr. Dann tan-la l’avé di téi sar fète sa lo 31 oktob (ziss avan bande fète moi d’novanm, la fète dé mor épi la toussaint) té kant mèm inportan k’i anparl banna.

Néna défoi san ké wi rande aou konte listoir i vien a la vi dovan ou.La pa touzour ké wi konpran sa mé boudikonte, kan wi rofléshi, wi apèrssoi kossa l’apré spass dovan out zyé é kèl kalité d’moune déssèrtin rényoné apré rande omaz. Bande zoubliyé, bande zabandoné,demoune konsidéré konm bande sou-zom é toudinkou an parmi lo moune inportan dann nout péi i désside lé l’èr pou panss banna, lé l’èr pou fé in moniman dann in simetyèr la Rényon pou nout toute panss azot.

M’a dir azot in n’afèr pou nou rényoné,lo souvnir bande mor, é landroi zot i lé sa sé in n’afèr k’i konte ;In moune la pa in shien é si li lé famiye avèk nou i fo ni sava panss azot o moinss inn foi dan l’ané, pétète i fo ni amenn in bouké flèr é si possib ni partisip in sérémoni rolizyèz épi kiltirèl an son onèr. Mézami mi koné pa zot mé mwin épi mon famiye, kan ni rante dann in simetyèr si ni panss in moune ni oi pi ali pars i lé fine pass l’ote koté é si ni koné pa la tonb ni dépoz in bouké koté la kroi zibilé. Sé konmsa ké ni panss azot.

Pétète pars ni panss in mor la pa vréman mor é ké ni kontinyé la vi avèk li mèm inn foi ké li la fine pass l’ote koté la vi. Shakinn i oi lé shoz konm li oi, mé toute nout zansète abandoné, mor san sépiltir, zot la fé noute péi konm nou ossi, zot la fé nout listoir konm nou ossi , zot la fé noute lang, noute kiltir konm nou égalman.

Alor alon félissite anou é demoune inportan dann noute péi, momandoné la panss sak lété konsidéré konm moins ké rien, mé ké pou nou zot néna in valèr konm nou, konm d’ote, é zot i mérite ni fé in tour dann simetyèr Père Lafosse é ni panss azot for mèm.Nou v’alé simetyèr père Lafosse, konm nou v’alé rande in vizite noute vyé famiye inn-dé zour apré é alon dir azot,bande zoubliyé, bande zabandoné, zot lé inportan pou nou.

A bon ékoutèr, salu.