Na inndé zour, in roprézantan plantère téi di, lé possib bande zanimo issi La Rényon lé riskab pa gingn lo rassyon k’i fo pou produi dolé, épi pou done la vyande, dozèf, é sa noré pa arivé si l’agrikiltire lété orynté dann la satisfakssion bande zanimo… Mwin la antande ossi lé possib bande boulanzé La Rényon lé an manke farine par raporte la guèr rante La Russie épi l’Ukraine. Mi rapèl ankor kan la fé la guèr l’Irak demoune téi bouskil inn-a-l’ote dann bande grande sirfass pars l’avé pèr mank do ri.

Mi di sa pa pou afol demoune mé pou dire lé possib manzé i ariv a manké, lé sir lo pri va si tèlman grinpé ké lo moune sirtou sak lé mizère nora difikilté pou donn manzé zot famiye.

Pou kossa mi di sa ?

Sinploman pou fé romarké lotonomi alimantère i doi pa kontinyé d’ète in parol anlèr sirtou ké toulmoune i panss sa sé in n’afèr possib. Si lé possib, é si lé nésséssère, pou kossa ni atande pou lanss anou bien konm k’i fo dann so lotonomi-la.

An atandan ni pé domande l’éta pou pran son résponsabilité.

Pou kossa ?

Gouvèrné sé prévoir konm ki di é gouvèrnman i pé pa rèss bra kroizé a rogarde bande péi apré anguélé, ménass inn – a-l’ote san prépare linprévizib. Gouvèrné sé prévoir é gouvèrnman i doi prépare bande stoke provizyon pou lo ka ou konm zordi. Li néna, l’érope néna é mi oi pa pou kossa va priv de moune dsi manzé.

An atandan alon bien mète dann noute tète lo kozman mi sava marke issi an ba : « La pa la vèye la shass i rouvère k’i fo komanss drèss lo shien. »

Justin