Mézami, zot i koné bande shagossien lété blizé kite l’androi pou bande zamérikin fé in gran baze militère dann lo l’arshipèl shagoss. Kissa i pé ésplike amwin kékshoze konmsa ? Kissa i pé di amwin pou kossa bande shagossien lété déporté, é si néna zordi d’ote moune dann Diégo Garcia, shagossien na pi. Alé Moris wa trouv azot ! Alé Sésèl wa trouv azot galman ! Alé Langlétèr néna laba ! Néna la Rényon, néna Rodrigues, néna Agaléga anfin néna in pé fane fané in pé partou, mé dann shagoss la poin. Sito k’in moune léné shagoss lé défandu ali rante dann son péi kissoi pou résté, kissoi pou travaye, kissoi mèm pou fé touris sis moi.

Poitan shagoss lé étalé dsi in sipèrfisi pli gran konm La frans é dann tan l’avé an pliss Diégo Garcia plizyèr zil té abité konm Perhos-Banos, konm Salomon, épi troi frère. Pou kossa bande shagossien i pé pa rèss dann bannzil-la. Poitan néna dé san kilomète rant zot épi Diégo-Garcia. Dé san kilomète la pa la porte a koté ; anvoye oute pli for kou d’galé wi ariv ar pa toush Diégo.

Dann Diégo néna bande solda amérikin, bande laviyon, bande sou-marin épi d’moune kissoi solda amérikin, anglé, kissoi bande zouvrié i sorte Philippine, sansa Singapour, kissoi ankor d’ote péi épi zot rèss la minm. Alor pou kossa bande shagossien i pé pa rèst la épi travaye dan la baz. La pèr zot i koze, Lé zot i koze pa don zot, zot na poin la lang don zot. Na poin in n’afèr lé shokan ladan ?

Mézami, bande zamérikin néna par-la 865 baze militère in pé dann tout péi avèk par-la dé san mil solda. Zot i panss bande zamérikin la fé lo vide, la shass demoune ? Pa ditou, lo moune landroi i rèss la. Dann Zapon bande zaponé lé kosté sanm la baze, dann la Koré di side, koréin di sid lé kosté sanm lo bande baze. Dann L’érop lé parèye. Dann Djibouti, la Turquie, L’arabi, é d’ote é d’ote é d’ote ankor néna d’moune. Poitan la poin shagossien koté la baze Diégo.

Kissa lé assé intélizan pou ésplike amwin kékshoze konmsa ? Kissa i pé dir amwin avèk bande mo sinpe pou kossa bande shagossien lété déporté, shassé an déor d’zot péi, é anpèshé d’rotourné ziska zordi. Kissa i pé ésplike amwin avèk bande mo sinpe sak l’arive bande shagossien néna prèss sinkantan ? Lèv bonèr, dor tar, mé mwin lé pa paré pou konprande in n’afèr konmsa é pa arienk mwin bande shagossiene, shagossien zot ossi lé pa paré pou konprande sa. Pars sa lé inkonpréansib épi skandalé sirtou.