Mézami, pou sak i rapèl koman la COI-komission losséan indien – lé né zot i doi trouv drol kossa li la devnu ; an débutan lété in rassanbléman bande parti progreessist, in vré parti d’rassanbléman pou bande pèp loséan indien : in mouvman k’i rassanb é sirtou pa in mouvman k’i rojète. Té valab in n’afèr konmsa !

Mé oila dopi s’tan-la, li la dévnu in rogroupman bann zéta avèk son bande mission mé firamézir la parti an lo d’boudin ziska ké La franss la mète son grapin la dsi é sa i fonksyone la ptite somenn : oussa i lé linivèrsité loséan indien ? Na pi. Oussa i lé lo rogroupman bande média ? Na pi non pli. Oussa i lé lantante rante bande pèp ? Na pi, na pi, na pi. Zéro kalbass la fimé Granboi.

Dèrnyèrman sé in fonksyonère d’La franss k’i fé la plui é lo botan, sé in lanbassadèr d’la Franss ki fé lo paon dann toussa, é biensir san mète lé moiyin-san lo nèr d’la guèr, mèm nou rényoné, ni égziss pi sé d’ote i égziss a noute plass.

La COI zordi sé in tissi d’kontradikassyon, par la fote La franss sirtou, par son rofi dékolonize pou vréman l’androi : el la kapare bann téritoir malgash é ziska prézan li fé lo vèr avèk sa. Tanka la solidarité avèk la Rényon ? Zing la boulette, bande pèp losséan indien – par zot zéta – i koné mèm pi si ni égziss sof pou vni tanzaote fé in konsèye minist shé nou.

Sa sé in n’afèr, mé sak lé pli grav, an parmi lo pli grav, sé par raporte Shagoss. Pa in sèl foi dann la COI la débate lo sor maléré noute bande frère shgossien-pèp loséan indien konm ni koné – mèm pa lo pli pti volonté dress lo rin dovan l’anglétère épi l’amérik. Même pa la volonté di dé shoze avèk la boush si i gingn pa di avèk lé zarm.

Zordi tribinal la mèr la fine di bande Langlétère i doi lèv zot balo épi larg lourlé bande chagoss épi rodone lo droi bande shagossien rante shé zot. Zordi la kour internassyonal La Haye la fine kondane Langlétèr é an mèm tan l’Amérik. La COI i oi pa, i antan pa, son boush lé také kan i parl noute bande frèr Shagossien.

Ziskakan ? Mi panss néna intéré k’i arète pars in lorganism toksik konmsa, éskize mon pardon, mé i vo myé lèv son balo si li rossézi pa. Do gré do fors i fodra parl shagoss épi bande shagossien.