Mézami néna dé shoze inkroiyab la s’passé dann shagoss. Sak mi di azot zordi lé pa nouvo pou sak i suiv do pré la késtyonn shagoss dopi k’èl la komanss a ète konu par lopignon piblik La Rényon. Mi arvir zordi dsi in zistoire bonpé i koné, mé solon mwin i fo di é rodi sa tèl fasson ké d’moune i roziss sa a fon dsi zot disk dir. Olivier Bancoult la rakonte sa ankor in kou samdi :

Kan Langlétèr avèk l’amérik lété fine déssidé fé partir bande shagossien an déor zot péi, la komanss fé dé nish demoune é pli pir an pli pir : In zour la di bande zabitan Diégo-Garcia amenn zot shien é banna la panss té pétète pou vakssine lo bande zanimo. Wi panss touzour demoune wi koné pa néna bone zintanssion. Mé lété pa sa ! Kan demoune l’amenn zot shien la fé rante lo shien dann kalorifère-sa i ansèrv pou bril bande déshé d’koko... Aprésa la mète dë kamyon l’armé, motèr alimé, é lo po d’éshapman dirékssyon la rantré lo kalorifère é lo rézilta : bande shien la étoufé épi lé mor intokssiké avèk lo gaz léshapman. Aprésa la brile lo bande zanimo konm avansa téi bril la paye koko.

Sirman zot va panss bande zanglé i yème pa zanimo mé la pa vré. La sékirité bande zanglé la fé vni bande bèl-bèl shien, bien soigné é toute, mé konm zot lé mortèl kan zot lé mor la mète azot dann in simetyère pou shien avèk toute lo konfor si i pé di sa konmsa. Ziska zordi simetyère lé bien antrotonu é lo shien mor néna son nom gravé dsi bande moniman.

Bande shagossien ossi l’avé zot mor dann simétyère, mé pèrsonne pou fé l’antrotien : zèrb la poussé, lo mir la kassé, bande plake i gingn pi lire. Konm de koi, néna lo shien é lo shien, néna simetyère épi simetyère. Racism san pour san é sak i done zot konfyanss bande Gb zordi i gingnré a mète bande zistoir-la dsi zot disk dira van fé kon fyanss bande zanglé épi bande zamérikin.