Mézami, in délégassion bande shagossien i sorte fé in sézour shé nou, issi La Rényon. Zot la anparl anou toute sak zot i sèye fère pou défande zot lidantité, é prépare azot pou gingn armète lo pyé dann zot péi natal… sak la bien ékoute azot, mwin lé sir zot la panss banna la vnyabou fé bokou avèk trépé d’moiyin.

Zot moiyin i vien d’zot mèm, d’zote zidé, épi la forss la konfyanss dann zot zidé. Kan Méssyé Bancoult, in vré dalon noute pèp rényoné, i parl lo droi son bande konpatriyote pou rotourn shé zot é pou viv an pé é bien konm ki fo, ni konpran bien pou li lo droi an késtyon sé in droi k’i transform an fors é ki démiltipliye lénèrzi dan la lite.

Mon promyé késtyon lé sinp : mi domande si ni fé assé d’zéfor pou in vré l’ède pou zot dan la lite ? Si lé vré, pou kossa alor nou la pankor dépoze in késtyon dovan la COI (commission loséan indien) pou lo droi bande shagossien rotourne dann zot péi natal. Si ni pé pa, par nou mèm kèl préssion nou la fé dsi sak néna lo pouvoir poze késtyon-la.

Kèl lobbiing ni fé ? Kèl préssion ni fé ? É koman ni pé ède vréman bande shagossien pou fé avanss zot koze. Mi propoze ni rofléshi é ni trouv, inn-dé-troi zidé pou avanssé.

Mon dézyème késtion in pé parèye ké la promyère : kossa nou la fé pou fé rokonète noute droi ète prézan dann la Coi-zordi nou épi zéro la gosh in shif lé parèye-prézan épi infliyan, dann la Coi é si ni gingn pa kossa ni fé pou dén onss partou in l aprèye toksik dsi déssèrtin poin.

Alor sère é frère, dalone, dalon, kamarade alon rofléshi ansanb épi fé sak ni pé pou fé avanss la koz bande shagoss an dirékssyon la COI.