Lo ka lo pli pré par rapor a nou sé la zéstikilassion lé dé minist la vni fé La Rényon é lo rézilta, in pantalonade dovan Téréos — mi mète pa sa an kréol pars in pé va trouv sa kaziman insolan… Nou va oir, nou va oir, nou va oir sak nou va oir l’éta la di é Téréos na ka bien ténir ali. Lo minis délégué la di, lo minis délégué va fé.

Toute demoune i koné bande plantèr l’apré négossyé in konvanssion é konvanssion-la lé kapital pou bande plantèr dann bande zané k’i vien. Toute bande partnèr lé dakor la dsi kissoi lo préfé, kissoi bande fabrikan d’rom, kissoi lénèrji, kissoi ankor bande sindika plantèr. Toute ! Sof inn i apèl Téréos.

Arienk li k’ i pans li la bézoin in garanti konm do koi si dann dé-troi zané lo pri dosik i bèss ébin arienk in n’afèr : kèl boukliyé l’éta franssé va ofèr ali si lo pri dosik i bèss é sirtou kissa nora la klé dann posh. Li lé pa transparan li mé li domande la min dsi lo kordon larzan.

Nou va oir, nou va oir, nou va oir sak nou va oir ! Apré son gran déklarassion dann télé, oila ké dovan bande négossyatèr li ronyé son parol é li koush atèr dovan Téréos. In possib ? Non tré possib, normal mèm vu l’éta é sak li roprézante, vu lintéré li défande… Pantalonade ala nou la !

Mwin la viv dann kor lo monst é mi koné son zantraye. A bon ékoutèr, salu !

Justin