Mézami, mwin mi vé solman anparl azot la kiltir popilkèr é pou kossa mi vé anparl azot sa ? Pars konm i di in pyé d’boi san rassine sé in pyé d’boi i tienbo pa d’boute, sé in pyé d’boi va tonb atèr promyé rafal siklone va souflé… La rassine in pèp sé son kiltir popilèr é kiltir-la i fé noute lidantité é opliss ni ranfors ali, opliss noute pèp va ranfors son baz é opliss li ranfors son baz, opliss li lé papab défann ali konte lo van mové.

Mi sava dir azot kékshoz sirman mwin la fine dir, mé défoi i vo myé répété plito k’obliye dir, osinonsa pran lo risk demoune i éfass sa dsi dik dir zot mémoir.. Alor figuir azot fitintan l’inivèrsité Sin-Dni l’apèl amwin pou done bann kour kréol rényoné. Promyé zour mwin la trouv in madam bien diplomé - bien amourèz noute lang - èl ossi téi vien pou done kour kréol é èl la di amwin : mi koné pa kossa mi sava fé avèk bann zétidyan si mi pèrmète èl i vien dan la klass avèk mwin.

Sito di sito fé, èl i pran son sak épi èl i suiv amwin é mwin mi fé assiz ali an parmi bann jenn-el té jenn.

L’èr-la mi panss dann mon kèr i fo pa tranm dovan graton é mi komanss anparl la kiltir popilèr : kissoi bann kossa in shoz, kissoi bann tèks séga èk maloya, in zistoir mon papa la rakonte amwin étan pli marmaye é pou fé sèryé ni fé in pé vokabilèr, gramèr… Dé zèr d’tan sa i pass vite sirtou kan wi parl kréol rényoné épi wi sèye fé révèye sak lé dann noute fon d’trip pou fé romonte ali an sirfass shé bann jenn té la, dsi madam lo proféssèr galman, dann mwinmèm galman.

Bon souvnir pou mwin parslo kour fini, lo pti proféssèz i vien oir amwin épi i di : « Astèr mi koné kossa i fo mi fé dann kour-la ! la kiltir popilèr sé lo méyèr zafèr pou nou »… Pou nou ranfors noute pyé d’boi-la.

A bon antandèr, salu !

Justin