Pars noute parti i vé pa lo sor lo pèp rényoné i désside san li é an déor d’li. Souvan ni rotrouv dann bande zidé noute parti lidé d’in projé par lo pèpe rényoné é pou lo pèpe rényoné. Mi doi dire sa sé in n’afèr k’i bote amwin plito bien.

Pars lo projé bande gouvèrnman kissoi gosh konm droite i suiv dopi 1946 la zamé bien kol avèk noute réalité, la zamé boudikonte korésponde avèk sak té i fo pou nou é pou noute péi trape in dévlopman bien korèk.

In pé va dir noute parti la pa sinssèr kan li propoze in plan konmsa. An kontrère li lé pliské sinssèr pars i zoué pa sanb l’avnir noute péi… In pé va di, noute parti i kroi père noël si li kroi sa sé in n’afèr k’i intérèss méssyé Macron épi ké i va tienbo konte si li rogingn son zélékssyon. Mi panss pa noute parti i kroi in père Noël pars dopi si tèlman lontan li la propoze son solission é gouvèrnman la pa tienbo konte. Mé sa i anpèsh pa li propozé.

Oussa i lé, d’apré mwin lo problème ? Lo problème sé ké noute parti na pwin lo moiyin pou fé antande ali, kan i déform pa sinploman son poinnvizé. Zot i rapèl pa lotonomi sé l’indépandans (konbien kriyèr d’nuite té i répète sa laboush rouvèr !) é apré avoir répète sa sépa konbien lo tan zordi i rokoné parti kominis la zamé marsh pou l’indépandanss. Li la touzour marsh pou lotonomi.

Donk, si ni vé fé antande anou é fé konprande anou, si in zour ni vé noute poinnvizé lé pi fossé ni trafiké alon pa konte dsi baton tonton pou travèrss la rivière ; konte dsi nou é pou konte dsi nou. Alon ranfors noute kapassité pou fé konprande nou pars otroman mi oi pa d’ote solission.

Pars sa sé in bon solission.

Justin