Mi sort ékout télé, Antèn Rényon. Moin la antann plis sink foi lo mo"fotèr d’ troub" an parlan n’bann marmay sak té apré vanj kont la polis.
É ! La pa apré konfonn lo bann rèsponsab dézord avèk bann viktime-la ?
Pars nana in pé lé byin trankil, i manz byin, i boir byin, lé san traka, lo pla byin gonflé épi zot i bouz pa.
Poitan, nana dé moi é-dé moi k’i parl la vi lé shèr, k’i parl pouvoir d’asha lé tro fay. Nana dé moi è dé moi, i di larzan lo moi lé fèb. Nana lontan foutor bann ti-rotrété, bann moun nana minima sosyo i s’anplègn la difikilté. É lo préfé, lo bann gro patron, ziska gouvèrnman, sa la pa fé azot aryin !
I prétan gouvèrné sé prévoir, é kisa la pa prévi, kisa la lès lé shoz alé an dégréné ? La pa sindika, la pa parti politik, la pa bann z’asosyasyon, la pa bann jenn i soufèr dann malizé, si tèlman zot na poin in bon formasyon, zot la poin travay, zot la poin larzan.
An finn kont, lé vré nana fotèr d’troub, foutèr d’dézord, pozèr d’ pièj, mé kisa i lé so bann-la ?
La pa sak banna i di dann télé. Pars si i anparl fotèr troub, i fo point lo doi déssi bann vré rèsponsab !

Justin