Matant Zélida la ékrir Justin :

Mon shèr nové, mon spès salté, rouj-de-fon dovan l’éternité,

Moin lé pliské sir zot, bann rouj-de-fon, zot lé partizan la kane vi k’zot lé partizan bann koz pèrdi d’avans. Poitan zot i koné bien l’erop i sava siprime bann kota é par l’fète rouine lo bann plantèr kann. Zot la bien antann mésyé Lurel kan li la di konmsa, bann rényoné i doi komans dézabityé viv dann in lantouraj kann. Zot i koné mèm lo moun la pa di lé shoz anlèr.

Li la di sa dovann bann dépité é bann dépité sosyalis La Rényon la pa révolté. Donk sa i vé dir sak lé dann kèr lo pouvoir i vé détriu lo kann. Pou anshévé shak zour nana in mové nouvèl pou nou. Lo dèrnyé nouvèl, l’Inn i vé vann son sik dsi l’marché mondyal é l’Inn sé plis vinn-sink milyon tonn do sik. Sé plis ki n’anfo pou boush in trou d’dan... Zot i koné kosa zot i rapè amoin ? Zot i fé pans amoin in ga téi apèl Don Quichotte. Lo boug té i vé batay kont moulin a van. Li té i pran sa pou bann gran jéan. Zot i rapèl la pa li la gingn lo konba. donk plito k’fé dé foli, i vodré myé ète in pé rézonab, bien oir lé shoz konm zot i lé zordi. Tok ! Pran sa pou toi.

Justin la fé pou répons :

Mon vyé matant k’i koz touzour la boush rouvèr

Ou i amiz amoin kan ou i trète anou Don Quichotte. Ou i di nou é nout parti la touzour défann bann movèz koz. Donk nou la touzour tronpé... Matant, vi koné bien sak vi di lé pa vré. Mi pé asir aou, si ni mark dsi in papyé tout bann soz parti kominis la propozé, tout bann projé li la mète an avan, mi pé asir aou lé rar li la tronpé.
Arzout èk sa kan i kroi li la tronpé, sé l’èr in paké d’zané apré i apèrsoi li na rézon. Sré tro long pou ékri tousala, mé la pa pou sa li l’avé tor. Si i anparl kann ébin sé la ki oi konm li l’avé rézon...

Mi sort lir in niméro éspésyal Témoignages i port antyèrman dsi la késtyonn kann é anplis ké nana in ta z’afèr pou lir é pou konprann, moin la rarman lir in dokiman klèr konmsa... an parlann l’or vèr La Rényon, sak i kroi pa moin, alé dsi internet, lir niméro éspésyal la, aprésa ni pé kozé. Fransh vérité nou na rézon désan pour san. Tok ! Pran sa pou ou !

Justin