Misèl Roccard i sort désédé é oila ké lo kèr dé gronouy i shant son louanj. Sa in gran bononm ! Sa l’avé z’idé klèr ! Sa té i oi l’avnir konmsi li oi dann in liv rouvèr ! Sa la modèrniz la gosh ! Sétaki i vant ali, sétaki i shant son kouplé ! Gosh konm droit, shakinn i tir son flite pou zoué in sinfoni la flatri.

Zot lé dakor avèk moin kan mi di azot : shakinn I oi l’èr dsi son mont-braslé, ali, pa si dsi sète lé z’ot. Donk si li la fé gran-gran z’afèr, tanmyé pou li é pou sak i vant ali, mé l’androi mi lé, moin la pa vi. Li lété troi z’ané promyé minis é pandan troi z’ané nout parti la pa arète tir signal d’alarm pou in vré solisyon pou nout problèm rényoné dann l’oséan indien san zamé k’i ékout ali. Sèl komantèr mésyé Roccard : i fo pa rode lo bèr, avèk l’arzan lo bèr…2pi la krémyèr par dsi lo marshé.

Lé ga, di amoin si li la toush lo Frans-afrik dann sans k’i fo ! Mi pans pa. Di amoin si li la fini la dékolonizasyon ! Di amoin si li la trouv in solisyon pou arète lo néo-kolonyalis, isi épi dann lé z’ot péi lo l’ansien anpir fransé ! Li la pa fé tousala. Di amoin si li la antrovi avan lé z’ot la késtyonn lo réshofman klimatik ! Mi pans pa : La Frans, konm La Rényon té forsé atann Paul Vèrgès pou signal in gro problèm konmsa.. Mi di é mi répète, mi oi l’èr dsi mon la montr, pa dsi sète lé zot.donk mi pé di par l’fète Mésyé Roccard la pa in gran rényoné, ni in gran vizyonèr pou l’outro-mèr.

Mi arète la é mi domann azot kontinyé dir li té gran pars konm di lo kont si li té gran, li té gran pou li ! Pa pou moin ! Pa pou moin ditou !

Nb : Li a fé lo rmi ? Bravo ! Mé li té kont k’i aplik pa sa dann bann péi l’outre-mèr. Sé li k’la di sa : la pa nou !