Dann in réjion l’Irak, i apèl La Mésopotamie, bann plantèr la fé in bonpé kalité lo blé : shak landroi in pé gran, shak group de moun in pé konsékan lavé invant son sienn. Sa la dir lontan, lontan mèm ziska lo zour bann z’amérikin la karsèr lo péi, la kapote lo gouvèrnman épi la fé in bann kalité la loi pou gonf lo pla bann kapitalis l’Amérik.
Donkalor, nana in sosiété la trap in pé tout kalité lo blé, la manipil tousala épi la fé inn-dé variété OGM, épi la donn bann plantèr la somans pou ranplas sak banna lavé par in kalité "modèrn", avèk bon-bon rannman, épi l’iniformité k’i fo ! An mèm tan la sort in loi pou anpèsh plant bann lansien kalité.
Komansman la somans, lété k’i donn pou arien épi firamézir lété an péyan... pli-zan-pli shèr shak ané. Konm in bon pé la poin lo pourkoi an sifizans, zot la anbandone la tèr pou sèy gingn z’ot soso an vil. Ala la sivilizasion ! Ala la défans lo patrimoine !
Mi éspèr solman, mèm moin lé pliské sir, dann in landroi pèrdi, dann in gafourn anklavé, bann plantèr la ramas in pé z’ot vié somans pou planté, pa zordi-pa domin, lo zour lo péi sar lib.

Justin