Médame, zé méssyé, la sossyété koze èk mwin sé koze èk in kouyon, mé sé o pyé d’lo mir k’i oi lo vré masson.

Mézami, mi panss nou la fine parl ansanb dsi kozman-la mé zordi mwin la anvi anparl ankor in kou. Sak i vé pa, li néna ka boush son zyé épi fèrm son zorèye, sak i vé bien ébin alon kozé. Zot i koné, an parmi sak i fé pa oir son défo, néna sak i sava rande vizite zot bèl maman promyé foi. Néna sak i rankonte son patron pou promyé zour tavaye. Antouléka, néna sak na poin intéré fé mal oir ali an débitan-osinonsa sak néna poin lintéré fé oir ali konm li lé pou vréman.

Kan labitide lé fé, oila ké li pé fé amontr in pé son ké, sansa son zorèye pointi i sorte dossou son po mouton… Astèr alon oir si sé in bon konsèye pou done de moune, sansa in mové konsèye : sa i dépan ! Demoune i pé majine ou sé in moune natirèl é lé bon pou ou, osinonsa zot i pé dir si promyé foi ou lé konmsa, désidéman ou sé in moune a toupé.

Alor, mézami, sé a zot de oir ! Sé a zot de oir si zot i amontr promyé débu zot vré karaktère, osinonsa zot i atande in pé. Mé antanssion i pé z’ète riské. Alé ! Mi kite azote pran lo tan pou rofléshi la dsi é ni artrouv pli d’van. Sipétadyé.