Dan la somenn, moin la trouv in dalon. Konm mi koné ali bien, nou la diskite in pé avan shakinn i sava son shé soi. Li di amoin li intérès pa la politik é anplis ké sa, solon li, Parti kominis konm tout lé zot parti la poin pou okip la kiltir. Sanm pou moin, li té i vé konpar la kiltir avèk la politik é solon li la kiltir lé konm in n’afèr nobl é la politik lé konm in n’afèr pouri. Moin, pèrsonèlman, mi pans pa konm li. Pou kosa d’apré zot ?

Dabor inn Parti kominis la fé bokou pou la kiltir. Kosa li té i fé kan li té i parl Listoir La Rényon èk bann pèryod dominasyon nou la sibi, é manyèr nou la lité. In légzanp ? Maloya : sa lété défandi sa, épi té i fé dann la klandéstinité, é a fors lité nou la fini par mète ali dan la limyèr. Lo boug i di sa lé pa vré, ébin, i fo li tourn sète foi son lang dann son boush avann kozé. Dézyèm-man : nana zaktèr kiltirel dann nout Parti konm dan d’ot é kan li fé la politik, li rash pa son po zaktèr kiltirel, é dann nout Parti demoun i ankouraz ali, mète nout kiltir anlèr. Troizyèmman : nout Parti i vé lo dévlopman dirab. Konm moin la di lo dévlopman na son bann poto d’soutien : lékonomi, lo sosyal, lo kitirèl épi l’anvironemantal. Donk in parti politik, konm la n’ot, li pé pa trète la kiltir an zétranjé.

Astèr in n’ot késtyon : si nana zaktèr kiltirel, si na ’asosyasion an déor d’le Parti, sa i voudré dir in parti politik i doi pa okip dé sa ? Mèm si sé li la donn la kiltir la plas èl i okip dann nout sosyété ? Non, i fo pa fé mové rèv. In parti, konm la not, sa i doi okip la kiltir konm li doi okip l’agrikiltir, la pèsh, la lite kont la mizèr, la lite pou in bon lédikasion pou marmay, la lite pou in bon l’antant avèk lé zot pèp épi lé zot pé, la lite galman pou défann lo droi bann travayèr épi pou donn kréol travay... Pétète, mi di sa épi sa i shok azot, mé la politik sé la vi é la vi sé sak nou la fine di in pé pli o.

Arzout èk sa : si nout Parti okip pa, sèryèzman, sak mi di an o la, li mète ali a l’ékar par raport la vi lo moun mon péi. Aprésa, koman li va fé pou viv an parmi son pèp konm poison dann lo ? Poitan sé sa k’i fo fé. Na poinn shomin an déor dsa.

 Justin