Bann patron la Frans i domann lo gouvèrnman pou donn in pèrmi travay tousa bann moun zot i anploy, alé oir, banna lé “san papié”. Gouvèrnman la réponn, va fé sa suivan lé ka. La pa di si va donn in lamann, sansa kèk zour la prizon lo bann patron.

Solman, antansion, sa i vé pa dir bann travayèr i pèy pa z’inpo : non va, zot i pèy z’ot z’inpo. Sa i vé pa dir bann patron i pèy pa la sékirité sosial pou bann travayèr : non va, zot i pèy la sékirité sosial. Sa i fé mazine amoin lo tan ousa lo tourné-viré bann madam té défandi dan la Frans, solman té i fé pèy azot z’inpo. « Larzan la poin lodèr », konm noré di lanpérèr Véspasien, lo l’invantèr kabiné dan la vil.

Alor, moin, Justin, gran patriot rokoni dovan Bondié, moin la trouv la solision pou ar-ranpli in pé la kès gouvèrnman. Akout amoin bien, mon plan lé paré : na ka mète an vant bann pèrmi travay, épi shak ané, fé pèy ankor pou ronouvèlé. Madam Lagard, minis lékonomi, na ka anvoy in méssaz zournal témoignaz, an rotour, moin va anvoy mon plan. An péyan, biensir ! Nou lé pa dann in sosiété kapitalis ?

Justin