Médam zé Méssyé, la sosyété, koz èk mwin sé koz èk in kouyon, mé sé o pyé d’lo mir k’i oi lo masson. Mézami, alon anparl in pé nout kozman : mi trouv lé bien, mé an kalkilan mi panss néna in bonpé zafèr lé né avan nou é poitan néna dé shoz lé pa réspéktab ditou é si wi vé viv konm in bon moun bann zafèr-la i vo myé wi gnor lo pliss possib : mi vé anparl dé shoz konm lésploitasyon, la dissimilasyon, la ène, l’intoléranss... Donk mi panss i fo aprann la politèss la pa pars èl lé né avan nou-èl lé né avan nou,sa lé sir-mé pétète pou d’ot rézon. Dabor la politèsse sé lo réspé pou lé zot épi pou ou mèm. Mi rapèl in vyé mékanisien moto téi di souvan défoi kan li té i roviz mon mobilète, la politèsse mon zanfan, sé konm luil dann rouaz lo motèr, sé par li ké lo motèri tourn ron. Mi panss li néna rézon, la politèsse sé in port rouvèr dsi la sosyété, i pèrmète aou bien viv an parmi lo mond. Mé mi éstope tèr-la, é mi invite azot bien rofléshi nout kozman-la é ni artrouv pli d’van. Sipétadyé.