Moin lé sir é sèrtin, nana in bon paké d’moun té i souèt dopi in bon koup de tan Gironcel té i pran lo fon. Moin lé sir galman, in bonpé d’moun lo kèr tazantan té i palpite akoz té i krin Gironcel é son bann dalon i pas pa. Mi koné, bonpé militan la zamé pèrd konfyans épi la done, shakinn son fason, son kou d’min pou la viktoir. La viktoir lé la, mé i fo ni mézir son l’inportans, lo bann kal pyé l’avé dann shomin pou ariv o-bi. Pars la viktoir la pa vni tousèl.
I fo pa ni obli, lo ranplasann mèr l’avé mont in list. Lo promyé l’adzoin, in sort Iznogood, l’avé mont in list galman. Lété konm si Maurice avèk son bann dalon té i amène in konba pou rash in komine lété fine pas dan la min bann kont-parti. I fo pa obli, bann kont-parti l’avé bonpé moiyin : arienk a oir lo bann kat-kat, arienk antann demoun di kosa la promèt azot. Arzout èk sa, zot la mèt palto Parti kominis konm, dann la fab La Fontaine i anparl, lo lou abiyé avèk la po mouton.
L’èr-la, lé normal Parti kominis la désid ripost kont bann z’agrésèr, é li la mobiliz bann dirijan é bann militan. Mé li la mobilizé avèk bann moiyin démokratik : distribyé trak, fé rényon piblik, koz èk demoun san promèt dé shoz i pé pa doné... Si Maurice l’avé pa gagné, kosa noré té éspasé ? Kliyantélis san pour san pou prépar z’éléksyon 2014 avèk la bénédiksyon sonant-é-trébushant la par d’la droite.
Rozman, lo pèp, dann son majorité, la konpran lo pyèz maté kont li, kont nout parti, kont nout kamarad Maurice, viktime la réprésyon. An souvnir défin Lucet Langenier, an rokonésans pou lo travay Maurice la fé, é bien fé ! Pèrsé, mèt sèk !

Justin