Mézami, kozman mi di azot sa i date pa d’yèr sa. I paré sa i romonte lo tan lésklavaz : dann tan-la zésklav l’avé poin lo droi porte shapo épi mète zoli linz zoli koulèr, mé inn foi zot té afranshi zot lété sitoiyin é zot l’avé déssèrtin droi - pas konm bande blan mé kant mèm pliss ké kan zot lété zésklav.

Lésklavaz lé fini dopi 1848 é an prinsip toute demoune lé lib : lib shoizi son linz, débarassé avèk lo kode noir é sirtou porte-shapo, mèm si droi-la lé pi tro an viguèr par la fote la plipar rantre nou la borde lo shapo… Domaz pars i protèz in pé la tète. Domaz ossi pars mi rapèl étan pti in kantité d’moune téi mète shapo é sa té in zimaz for pou mwin.

Mi rapèl in madam téi apèl madame Tam téi rèst koté la kaz é té apré done konsèye son nové ramassé, el téi di : « Zilbert, mon zanfan, avan rante dann biro, wi tir oute shapo. Pars in n’ome sé in shapo. »

Alé ! Mi kite azot rofléshi la dsi é ni artrouv pli d’van, sipétadyé.

Justin