Mi pans zot i oi déza kosa sa i vé dir. San sprop : la mèr, sa lé gran, sa lé for. kan lo roulo i ariv : tansyon pangar !

In boushonn paye, zot i oi kosa i lé : in kou mèm, la mèr i fé sote sa ! Donk lé pa késtyonn anbar la mèr avèk in boushonn paye. Sansa na lontan Didier Robert té fini fé son rout litoral ! Sans figiré : lé pa posib fé in gro kékshoz si ou nana ti moiyin. In légzanp ? Kan la rivir i dsann avèk son voyaz la tèr, bransh, galé, si ou na poin in bon dig, la pa ou pou anpèsh la ravine fé son kasé brizé…

Kosa zot i anpans zot ? Arien ? Fé travay z’ot koko ! Fé bouy z’ot matyèr griz ! Zot va oir si rant-rant ni tonm pa tazantan dakor rantre nou.