Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Ankor bon nouvèl pou fé soign anou…

lindi 19 févrié 2024, sanm Justin


Kan mi di azot, gouvèrnman La franss i konbate la povrété, mi panss zot i pé kroir amwin vik sé sak lo pti Prézidan la di, dann son bann kozman é sé sak son pti promyé miniss li ossi i di dann son bann diskour dopi lo zour li la pass shèf gouvèrnman. Sinploman ké zot épi nou, ni konte pa parèye.


Sak i fé ké ni kroi pa zot — mé la pa zot fote — sé kan i anonss bann goumantassion bann pri — a komanssé par léstréssité ; li la goumante 50 % an mèm pa troizan. Pou li sa sé in l’évolission normal bann pri épi in sinp ratrapaz pa raporte bann réazistoman la pa fé dopi lo tan d’covid.

Zot i sar pa dir anou zamé sa sé in bann shoi la fé dann domenn lénèrzi é poitan sé sa mèm é sé pa in n’ote zafèr. Solman oila zot lé bien kapab dir anou, normalman, noré té pli shèr si dann domenn lénèrzi gouvèrnman La Franss téi pratik pa in pérékoission…

Nou la fine dir sak ni panss é ké li konte pi dsi nou pou pan po d’shanm pou pla kouvèr… Mé so soir-la ni sorte aprann in nouvèl mwin lé sir i sava pa pouss demoune pou fé soign azot mèm si i di sa lé pou sov lo finanss la sékirité sossyal. A partir d’la fin di moi olèrk pèye 50 santime l’éro dsi in boite médikaman ni sava pèye in éro. Pliss dë éro dsi la vizite médssin. Pliss ankor in forfé dsi lanalliz, dsi la radio é dsi toute kalité trètman.

Donk sak néna lo moiyin li va kontinyé konm avan, li va pèye pliss in poin sé toute ; mé sak na pwin lo moiyin é bin li v’arète in kou pou fé soign ali é tanpir si sé lo pov k’i san passé ankor in kou.

A bon antandèr, salu !

Justin


Inn modékri, inn ti lavi, inn komantèr ?

signaler contenu


Facebook Twitter Linkedin Google plus