Matante Zélida la ékrir Justin :
Mon shèr nové, mon spès salté,
Alor, so kou isi, si mi konpran bien, zot, bann rouj-de-fon, zot lé kont k’i bès bann produi bien itilizé dan La Rényon. Pars si zot té pa kont, zot nora fé konm in bonpé d’moun, zot nora bat la min kan zot la antann in bonpé marshandiz i sava bésé, sansa i bouj ar pa ziska finn moi d’désanm. Non va ! Zot lé pa kontan ! Zot i di, madam Nassimah é mésyé Didier l’apré gaspiy l’arzan bann koléktivité. Zot i anparl in gaspiyaz plis vinn-sink milyon. Poitan, mèm si moin la parti dé zour solman l’ékol, mi konpran bien so vinn-sink milyon-la, bann konsomatèr rényoné i dépans ar pa, donk sar bon pou zot posh. La vérité, sanm pou moin, sé k’in n’afèr zot la zamé gingn fèr, zot lé pa kontan lé z’ot i fé. Tok ! Pran sa pou toi !

Justin la fé pou répons :
Mon vyé atant k’i koz touzour la boush rouvèr,
Mi oi bien vi vé pa oir pli loin ké lo bout out né. Pou kosa ? Pars, sof mon réspé, l’arzan bann koléktivité v’alé dirèk dan la posh bann pétrolyé, épi dann sak i apèl lo gran distribisyon. Konm banna lé résponsab la shèrté d’la vi, ala in bon rékonpans pou zot, in rékonpans lé pa mérité, sirtou ké dan zot z’afèr, i oi klèr konm dann in fon marmit, é kan i vé pa èt klèr, sa i vé dir na kèkshoz pou kashyété.
An pliské sa, si bann koléktivité i fé bann kado konmsa, pou plis dis milyon l’éro, d’apré bann shif moin la antann dann télé, mi pans i fodra zot i fé pa désèrtin dépans itil, mèm obligatoir zot la prévi... Si l’Éta l’avé désid rann in pé l’arzan li doi bann koléktivité — sink-san milyon, arienk pou Départman ! —, nar pa été difisil pou goumant lo pouvoir d’asha bann Rényoné. Sinploman, konm Elie Hoarau i di, done dé-san éro par moi pou bann famiy dan la difikilté.

L’Éta i an lav lé min. LO gran distribisyon i pèrd pa bonpé plim dan l’afèr ; Bann pétrolyé i gonf zot pla. In pé i boir parol Préfé. Ankor in manyèr, boudikont, pou taz bann Rényoné. Tok ! Pran sa pou ou !

 Justin