Pou lo bienète bande famiye épi bande zanfan zot mèm, koméla néna in l’anploi i apèl aesh :avansa l’avé le loxiliaire de vi é sa lété inn pèrsone té sharjé okipe in zanfan andikapé dann la vi skolèr, dann son linserssion dan la vi sossyal épi pou son sékirité. Dan l’ékol piblik i mank demoune konmsa é wala pou kossa pou bien aprande lo métyé néna in éskolarité é sa i dir in an.- moinss ke sa ou lé pa kalifyé.

Mé in moune normal noré pu pansé si li angaj ali dann in voi konmsa lo salèr noré suiv lo l’éfor li la fé. Mé lao dann lo pouvoir néna-i fo kroir-bande tète tayé pou raz la pinte bande travayèr. Sé pou sa ké banna la sorte in règloman i konvien pa ditou bande persone l’aprande métyé-la.

In l’égzanp : pou komanssé néna troi zéslon avèk shakinn troizan .Mé dann lé troi wi pèrssoi arienk lo smik donk ou lé travayèr pov. Astèr pou imilyé banna i sava fé in sèl proféssion rantre zot épi lo bande AED(aide éducative à domicile) é sa in bande i travaye pa avèk bande zélèv andikapé.

Akoz la rogroupe lé dë ? sirman pars bande koko fromaz lédikassion nassional i konfonde lé z’inn é lé zot é pétète zot la zamé vu in ka d’travaye do pré. Antouléka, wala ankor in katégori sar oblizé rante dan la grève pou in rovandikassion valab.

A bon antandèr,salu !