Si zot i rapèl bien,na pwin lontan, mi koné pa bien pou kossa in radio la done la parol bann zoditèr san favoriz in kan plito k’in n’ote é vitman-vitman lo bann konvèrssassion la déboush dosi la difikilté d’viv étan kominiss , la répréssion, linzistiss é toute in kantité vilin manyèr ladministrassion té i fé anou.

Biensir mwin la fine anparl de sa ! Biensir konm la plipar bann militan kominiss mi rapèl bien tout sak nou la passé dann tan-la .Mé sirtou tout sak lo pèp rényoné la passé par rapor bann zotorité é lo bann mové trètman zot la konète. Ni doi anparlé , sa lé sir, mé pa solman an parlé, i fo ni fé roviv bann paj nout listoir pars sé listoir la Rényon.

Mi rapèl lo tan nou l’avé in film-in sèl- é sa téi pass é ropass.Son tit : « Dosik amèr ».Sa téi pass kaz-an-kaz la plipar d’tan dann fénoir pars lété défandi pass sa é lété si tèlman anrishissan pou bann famiye épi bann militan l’avé konète tan-la…Sirésèrtin fime-la téi anparl listoir nout péi dann tan la répréssion mé téi parl ossi la kapassité nout parti épi nout pèp pou rézisté.

Astèr ni pé dir :sa la spass dann tan lontan é ni oi pa pou kossa i fo ankor anparl sa ?Mé dir sa, sé konmsi ni di listoir lé fini, la soufranss nout pèp lé fini, son shène- toute son shène la fini kassé… Poitan li lé pa fini é néna ankor in kantité bataye nou la pankor livré pou kass nout shène firamézir.

Astèr alon kalkil in kou ! Lé vré nout parti la pran sa par dann bann konba nout pèp la livré mé lé vré nout listoir lé pa fini é bann konba a méné lé ankor dir, lé ankor inportan…Ni pé mèm dir sa lé marké dann lékritir nout bann dirijan épi nout bann militan é sa sé lézarm pou nout pèp rényoné épi son libérassion.

Mission akonpli, ni tak baro ? Non !Néna ankor tro a fèr é nout bann zanssien landroi zot i lé i konprandré pa ni arète an shomin.Nout pèp ossi i konprandré pa sa !

A bon antandèr salu.

Justin