Ankor in kou d’rèsst trankil pou bande zanglé, pou in lémission ilégal bann tinbre

Mézami,gouvèrnman bande zanglé néna si tèlman vilin manyère-é si tèlman tor-ké li lé pankor fini pou gingn koudboi avèk bande zinstitissyon internassyonal. Sa i mérite ali bien pars in gouvèrnman normal in pti pé umin i fé pa sak li la fé avèk bande shagossien .

Gouvèrnman bande zanglé la désside fé in park marin dann in larchipèl lé pa li ,Bannzil Shagos. apréssa Moris avèk li la parti an prossé dovan lo tribinal la mèr.Rézilta : tribinal la mèr la done ali tor, é la désside Shagos i apartien pa la Grande Bretagne, si i aplik bien lo droi internassyonal la dékolonizassion.

Apréssa la parti dovan l’ONU réini an assanblé zénéral.La majorité bande péi la done ali tor ankor é konm li téi vé pa trouv in l’antante, la done lo droi Moris pou sézi la kour internassyonal La Haye…

Issi La Rényon nou la antande parl de sa vi ké bande rényoné la bien assossyé pou anvoye in délégassion shagossien La Haye. Zanglé la gingn tor ankor in kou é noute toute i souvien kan la shagossienne Lisby la rakonte son maléré sor dann tribinal.

So foi si, gouvèrnman bande zanglé , koshon la manj la onte, la déssid in lémission lo tinbr avèk péizaz Shagoss . L’arivé sak téi doi arivé : ‘lunion postal univèrsèl la fé konète Langlétèr lé pa androi d’fé sa, pars sé ilégalman ké li lé prézan dann Shagos. Ala Ankor in kou d’rèsst trankil pou bande gouvèrnman zanglé é la pankor fini.

Opliss v’alé, opliss Langlétèr va gingn tor dovan toute bande nassion é final de konte bande shagossien va fini par gingn rézon :dann noute kèr zot néna déza rézon, dovan lopinyon mondyal galman, in zour i apèl domin bande shagossien va artourn shé zot.

Justin