La pa manké, li la anparl bann bato ataké dann Kanal Suez sansa dann la Mèr Rouz épi la désside kontourn l’Afrik par lo Kap Bone éspéranss ; bien antandi bann rézistan té batizé térorist san k’bann zoinalist i sava rode plki loin. San dir anou banna — bann houti — i gouvèrn dann pliss troi kar zot péi lo Yémen é san dir anou non pli ké banna la déside atak bann soutien d’Israel.

Méssyé lo préfé la kant mèm mète anou an garde dsi lo pri marshandiz lé riskab ranshéri. Solman li la di :« la pa bézoin kriyé avan k’i fé mal ! ». Solman wala, mi fé la romarke bann télé la pa bézoin ésplike anou lo pourkoi du koman é kossa l’arivé pou vréman. Mèm si ni konpran pa sak i ariv, i fé arien, provi ké ni gob zot zidé réakssyonèr.

Astèr si ni rotourn in pé an aryèr, banna la rakonte anou la vi la ranshéri pars la Russie l’atake l’Ukraine mé la pa di anou pou kossa poitan noré été intéréssan pou konète sa. In zour in zoinaliss la di amwin li lé pa in mète d’ékol ébin lé bien domaz pars lo mète d’ékol nora fé in n’éfor pou ésplike anou sak i éspass.

Astèr bann zoinaliss ofissyèl i vé ké ni kroi sé par la fote bann téroriss si la vi i anshéri ankor an pliss. Sirman nou va kroir, mèm si dann lo fon dé shoz sa lé pa vré. Biensir noute zoinal va démanti shak foi ké li pé, mé li gingn ar pa kouv la voi bann sharjèr d’lo sof avèk lo tan. Pou sa mèm i di : « Bann mantèr la pate lé kourte ! »

A bon antandèr, salu !

Justin