Astèr pou komanss par l’komansman alon oir in pé kossa i lé lotonomi alimantèr pou nou issi dann noute péi La Rényon.

Pou komanssé i fo ni sava fé linvantèr dsu sak ni manz é noute manyèr manzé pars i bouskil pa la fasson manzé in kominoté konm la n’ote si lé pa dan l’obligassion pou fèr. Mi rapèl in zour i ga dann sid la foute amwin inn pik dann in sobatkoz pars mwin la di la baz mèm noute manzé sé lo ri, é sé lo ri dopi in bon koupe de tan. Avan lété mayi, avan mèm lété manyok demoune téi manz an mové kassav.

Dousman lo bato ! Si ni di zordi i fo toute kréol i arkomanss manz kassav manyok, sansa mayi, épi trass inn kroi dsi lo ri, ébin mwin lé sir demoune va di « pran oute lotonomi alimantèr pou ou pars nou la pa bézoin » — ni arkomanss pa avèk lo patate-manyok é lo manyok-patate… nou lé pèrdi d’avanss.

Si ni rotourn in pé an aryèr dann tan nout listoir kan bande zésklav épi bande zangajé téi manz bande mové kassav, lésklavazist épi lo zangazist — bande blan si ni vé ! — pou zot par zot téi manze dori. Lé normal demoune i rode sak lé méyèr pou zot dann sanss zot dignité épi zot fyèrté é momandoné lété lo ri é kan la mazorité d’moune la gingn manz dori, ébin zot la parti manz dori pars sa téi aparète azot konm in sorte promossion sossyal.

Parèye kan lo moune la shoizi rante dori épi mayi : dori té konm in promossyon é lo mayi lété lo sor lo moune mizèr. I étoneré amwin zordi si i trouv ankor demoune pou manz mayi si la pa par fantézi avèk kari kanar par égzanpe.

Astèr si zot i vé konprande amwin mi di dori sé la klé noute lotonomi é si ni vé z’ète otonome dsi la késtyonn manzé i fo ni produi dori é biensir sa lé possib pou nou issi La Rényon konm dann toute bannzil loséan indien.

A bon antandèr, salu.

Justin